| Text |
Anno MDCCX Mensibus Octobris, Novembris, Decembris / Posteaquam Serenissimorum Academiae Iuliae Nutriciorum benignissima voluntate una cum Politices et Eloquentiae professione, Theologiae positivae professioni ordinariae sum admotus, die 23 Septembris munus hoc in Consistorio publico suscepi. Mensis Octobris die 2 novis lectionibus Theologicis prolusurus, orationem habui auspicalem de genuino Politices et Eloquentiae in Theologia usu: et paullopost programma typis excusum, illis praemisi. / Auspicatus deinceps sum praelectiones publicas in beati nostri Gebhardi Theodori Meieri theologiam fidei, eiusque caput primum de religione in genere, de naturalismo, christianismo, cetera, explicui. Quod reliquum erat temporis, conscribendae inaugurali disputationi de mysterio trinitatis contra auctorem Latitudinarii orthodoxi impendi. Iustus Christophorus Böhmer |