| Text |
Aprilis / Die tertio habita est Disputatio inauguralis Iuridica, egoque coactus sum proficisci Wolfenbuttelum a Serenissimo Principe Rudolpho Augusto evocatus, unde demum die octavo licuit redire / Reliquis statis diebus omnibus usque ad 17 qui erat propridianus Festi Sancti coenae docui ut caperem de Experientia rerum civilium, quomodo scilicet ex singularibus usu perceptis universalia praecepta civilis prudentiae eaque firma et solida parari possint: et huic doctrinae imposui finem / Dies reliqui huius mensis feriati sunt: / egoque interea 26 Aprilis Hannoveram curandorum negotiorum meorum caussa profectus domum redii secundo die mensis sequentis / Maius / Hoc mense dies X et XImus solennibus Doctoralibus in Facultate iuridica, XIVtus Wolferbyti deductioni funeris Illustrissimi Comitis Barbyensis, XXmus primus Visitationi Ecclesiae Twulpstetensis et XXXprimus sacris feriis Domnicae Ascensionis impensus fuit / diebus reliquis statis docui, quem ad modum per demonstrationem certa aliqua et infallibilis prudentia universalis rerum civilium queat comparari / Disputavi item bis publice, semel 16 iterum vicesimo sexto die examini propositis Animadversionibus meis mss. ad Machiavellici Principis caput IV, V, VI et VII / Iunius / Perrexi in eadem utilissima, et hactenus neglecta doctrina, eamque absolvi die octavo Iunii, qui erat propridianus Sanctae Pentecostes / Sequentes hebdomades duae sacra publica partim, partim et periculosi morbi trium liberorum sibi tribui iusserunt / Succissivis porro horis horum mensium elaboravi etiam domi illam hactenus non tritam doctrinam de Experientia et Demonstratione politica, atque ita caput decimum tribus amplius plagis typis excussis addidi ad librum de Civili Prudentia / 23 Iunii 1660/ Hermannus Conringius manu propria |