| Text |
Anno MDCLX / Mense Novembri / Diebus prioribus huius mensis iterum de Austriacae familiae incrementis, Caroli V. natalibus, et Electionis eius nonnullis circumstantiis, ubi obiter etiam de incommodis quibusdam regni electitii / deinde de potissima Causarum circumstantia acturus, competitoribus seu Candidatis Imperii, regibus item principibus et populis exteris, qui sua aliquid electionem huius vel illius interesse putarunt, enarratis, in genere de ultimis principum ac rerum p. finibus seu scopis nonnulla monui / In specie postea de Caroli Hispani et Francisci Galli in electionis negotio causis seu rationibus dicere aggressus sum / XII, XIII, XV nundinis et nuptiis ancillae domi meae celebratis pergere prohibitus, perseqq. dies de eorundem regum causis agere perrexi, ac controversiis eorum ad IV summa capita seu principales controversias, Burgundicam, Neapolitana, Mediolanensem ac Navarreaeam revocatis, de singulis illis earumque antiquis novisque causis ac iuribus per singulas horas verba feci / post alias etiam mutui et haereditari odii metusque inter reges illos eorumque maiores, Burgundos et Aurelianenses Duces Maximilianum item Imp. regesque Galiae causas, et cur praeter propriam Imperii cupiditatem alter alterum in eo consequendo impedire necessarium sibi duxerit, exposui / Ex illis tamen diebus XIXum et XX iter Schöningam ex decreto consistorii ad salariorum partem recipiendam susceptum / et XXII Disp. Inaug. Theologica / et XXVII funus viduae d. Fabricii exemerunt / Christianus Eberhart |