| Text |
ANNI MDCCII / Mensis Iulii / Diebus 3 [et] 4 Quo tempore morbi et diei diuretica conveniant et quaenam praeterea in eorum usu cautelae sint attendendae docui. / Diebus 6 [et] 7 Quomodo magnus sudoriferorum apparatus variè inter se differat, quotuplex eorum agendi modus sit practico in selectu observandus demonstravi. / Diebus 10 [et] 11 Erant nundinae oppidanae. / Diebus 13 [et] 14 Ob iter non docui. / Die 17 De distinctione sudoriferorum in volatilia, fixa et media locutus sum. / Die 18 Quomodo in sudoriferorum opportuno usu, diversum corporis statum, diversas morborum conditiones, diversum morbi tempus, semper respicere oporteat ostendi. / Die 20 Erat mutatio Vice Rectoratus. / Reliquis huius mensis diebus ad aegros evocatus docere non potui. / Mensis Augusti / Die 1 Quot modis sudatio fiat descripsi, et cautelas Practico necessarias addidi. / [v] / Die 3 Amicorum prasentia lectionem impedivit. / Die 4 De venae sectione coepi agere, quaenam in sanationibus morborum sanguinis missionem requirant, ostendi. / Die 7 Erat hora lectionis consistorium publicum. / Dies 8 An et quomodo venarum secandarum delectus [?] requiratur explicui. / Die 10 Materiam de revulsione et derivatione pertractavi. / Die 11 De Venae sectione Kadizer dixi et an per venae sectionem massam sanguineam depurare liceat, disputavi. / Nundinae Brunsvicenses postea interveniebant, quibus elapsis redii ad lectiones. / Die 25 Et quid ratione aetatis et sexus differentiae, anni quoque temporis in sanguinis missione attendendum, et num ad lunae phases et signa à calendariographis possita etiam hic respiciendum sit, exposui. / Die 28 Qua quantitate sanguis educendus et quid in ipsa sectione venae observandum explicui. / Die 29 Quomodo post sanguis missionem se gerere debeat patiens, an somnus tunc et quando concedendus. / Die 31 An et quaenam è sanguine vena secta emisso iudicare possimus. / Mensis Septembris / Diebus 1 [et] 4 De Acteriotomia lectiones habui. / Diebus 7 [et] 8 Domo abfui. / [87r] / Diebus 11 [et] 12 Erat mercatus oppidanus. / Die 14 De scarificationibus et hirudinum usu egi. / Diebus 15, 18 [et] 19 Ad aegros itinera facere coactus sum. / Diebus 21 [et] 22 Ad evacuantia particularia accessi et in specie errhinorum, sternutatoriorum et apophlegmatistantium usum consideravi. / Die 25 De bechias egi et ad Alterantium considerationem progressus sum. / Die 26 De Alterantium Medicamentorum usu recto plenius egi. / Sequebantur feriae ordinariae. / Mensis Octobris / Diebus 2 [et] 3 De confortantium remediorum operatione et discrimine egi. / Diebus 5 [et] 6 Iter ad aegrum me avocavit. / Die 9 Quae de roborantibus medicamentis restabant subieci. / Die 10 De diaetae et rerum non-naturalium efficacia in reparandis viribus per morbos amissis egi et praelectionibus his de Medendi Methodo finem imposui. / Die 24 Novas praelectiones de decoro in Arte media faciendo et medici munere dextre et prudenter gerendo lectiones auspicatus sum. / Die 26 Peccare illos medicos dixi qui artem facturi plus suae eruditioni et peritiae quam benedictioni divinae confiderunt. / [87v] / Die 27 Quos fructus pariat fides et valida spes aegri erga medicum et medicinam exposui. / Diebus 30 [et] 31 Quibus modis licitum sit Medico fidem et amorem sibi parare et an quo virtus et prudentia non pertingit, astu et technis enitendum. / Mensis Novembris / Die 2 De diligentia et assiduitate, quae in medico requiritur et vitanda polypragmosyne egi. / Die 3 Dixi de alacritate et promtitudine quae in Medico requiritur. Proximam hebdomadem insumsit iter ad aegrum. / Diebus 13 [et] 14 Erant nundinae oppidanae. / Die 16 Habebatur consistorium publicum. / Die 17 De patientia Medicorum erga patientes occupatorum dixi. / Die 20 Praesentibus Medicinae studiosis cadaver viri gravi pectoris vulnere interemti in vicinia aperui. / Die 21 An medici integrae valetudinis valetundinariis semper praeferendi sint indagavi. / Die 23 De decenti medici ornatu et munditie egi et an aegrotantibus expediat plures medicos consulere disputavi. / Die 24 Quid in consultationibus cum aliis medicis instituendis observandum sit explicui et praelectiones hac absolvi. / Mense Decembri / Effecerunt itinera ad aegros ut ante ferias novas praelectiones ordiri non potuerim. / Friedericus Schrader doctor |