| Text |
Mense Ianuario / Die 11 Ad lectiones reversus, inde usque ad 15 sub Sigismundo Imperium et in Reipublica et ad Ecclesiae statum tranquillandum acta simulque utriusque Concilii, Constantiensis et Basilensis, exposui die 17 De Alberto II Austriaco egi. / Diebus 18 et 22 Diuturnum Friderici III regimen et tranquillum sub eodem Germaniae statum explicui. / Die 21 Mutatio Vicerectoratus. / Die 23 De interitu occidentalis Imperii excidio Constantinopolis deque instaurato per eam occasionem in Occidente graecarum litterarum splendore et Typographia inventa digressionem feci. / Diebus 24, 25 et 28 Reipublicae Germanicae statum sub Maximiliano I., bonis legibus et institutis compositum expendi: bella itidem cum Gallis inprimis et Veneticis gesta et Burgundicam haereditatem in domum Austriacam illatam persecutus sum. / [v] / Diebus 29, 31 et 1 Februario Ingentem sub Carolo V. et in religionis negotio, et in civili statu, mutationem ingressus, res primo ab eodem gestas amplissimas secundum bellorum seriem percensui. / Mense Februario / In eius initium inciderunt Nundinae Brunsvicenses, quibus finitis usque ad diem duodevicesimum Civilia Caroli negotia et reformationis historiam explicare continuavi. / Die 19 Tranquillum Ferdinando I imperante Germaniae statum, Bohemiaque et Ungaria regna Austriacae domui innexa exposui. / Die 21 Moderatum Maximiliani II regimen, multaque prudentiae et aquitatis laude gestum consideravi. / Diebus 22 [et] 25 Continuatam quidem sub Rudolpho II Germaniae tranquillitatem, sed enata passim contra pacem inprimis religiosam gravamina, atque facta hinc inter ordines discordiarum et dissidentiarum semina, quae futuris malis proluserunt, tradidi. / [62r] / Die 26 Turbatum sub Matthia Germaniae statum et initia motuum Bohemicorum explicui. / Mense Martio / Diebus 28 et 29 Februario [et] Diebus 3 [et] 4 Martio Quomodo in Bohemia accensa belli flamma, inde in proxima diffusa, universam mox Germaniam incendio suo involverit, bellique illius sub Ferdinandis II et III progressum sum persecutus. / Diebus 6 et 7 Pacis inde reducte historiam et mutatum per eandem Germaniae statum, inque Comitiis Ratisbonensibus paulo post insecutis acta tradidi, eorum porro, quae sub Leopoldo Augusto contigerunt, summam brevissimis perstrinxi. / Secutae sunt Feriae passionis Dominicae et Paschales. / Hermannus Dietericus Meibomius |